Doston Ravshan

Ish buyursang oson qilib ayt

Hazrat Ashraf Ali Tahonaviy aytadilarki, umuman olganda odamlar biror kishini ishga buyursalar gapni to'liq, mukammal qilib aytmay, chala gapiradilar. Keyin ular ishni ko'ngildagidek bajarmasa xafa bo'lib yuradilar. Xususan shogirdlar. uydagilar, xodimlar bilan qilinadigan munosabatda bu holat ko'p uchraydi.

Birovga bir ishni buyurayotgan vaqtda gapni mukammal, ochiq va oson yo'l bilan tushuntirish ham odob hisoblanadi.( Iqtibos tugadi)

Haqiqatan ham o'ylab ko'rsak bu holat deyarli barchamizda uchrab turadi. Vaziyat taqozosi ila kimnidir ishga solishga to'g'ri keladi.

✅ Shu sababli ham yuqorida o'tgan maslahat ancha manfaatli bo'ladi deb o'ylayman.

16.05.2024

Shukr

Ma'lumki har qanday narsa yorug'likni o'ziga qabul qilib uni qaytaradi. Shu asosda biz ranglarni ko'ramiz.

Lekin ba'zi insonlar borki barcha ranglarni ham biz ko'rganimiz kabi ko'rishmaydi. Bu ularning kasalliklari bilan bog'liqdir.

Birinchi rasmdagi normal odamning ranglarni ko'rishi, qolganlari esa rang ajrata olmaydigan kasallikka chalingan insonlarning ko'rishlari.

Bir o'ylab ko'ring, naqadar kam shukr qilamiz-a...

Bu bizga berilgan ne'matlardan biri rang ajrata olish qobiliyati, xattoki ko'rish ham emas!

Shuning uchun ha deganda bizda yo'q narsalar haqida o'ylayvermasdan bizda bor narsalar haqida o'ylab, shukr qilishimiz kerak.

09.05.2024

Hali hammasi yaxshi bo'ladi!

Muammolar ularni yechish uchun keladi.

Qiyinchiliklar ularni yengib o'tish uchun keladi.

Musibatlar bizni yanada toblash uchun keladi.

Barchasi biz uchun yaxshilikka bo'ladi. Faqat buni bilish uchun vaqt kerak bo'ladi.

Asosiysi bizga kelgan narsalar emas, ularga bo'lgan munosabatimizda!

Yaxshilikni umid qilaverish kerak, Allohdan uning yaxshiligini so'rab duoda bardavom bo'lish kerak.

Bu fikrlar oxirgi davrda yurtimizdan chiqqan eng katta ulamoning shogirdlari tomonidan eng ko'p eshitgan gaplaridan xulosadir.

😊 U zotni tahmin qilib ko'ringchi ...

Hozirda juda ko'plab negativchilar bo'lgan paytda positiv bo'lish nihoyatda muhim bo'lib qoldi.

04.05.2024

Keyingi ishni rejalashtirish

Shayx Muhammad Sodiq Muhammad Yusuf hazratlarining tavsiyalari qatorida bir tavsiyani iqtibos qilsam:

"Bir ishni deyarli bitirib bo'lganda keyingi qiladigan ishni tayin qilish kerak."

O'ylab qarasangiz har doim bir ish tugasa, endi nima ish qilaman deya o'ylab, vaqt ketkazamiz. Agarda ushbu tavsiyani o'zimizga qoida qilib olsak, vaqtimizdan yanada unumli foydalanib, ko'proq ish qilishga ulguramiz.

27.04.2024

Masjid haqida

Masjid qanday joyligi, unda nima amal qilinishi deyarli barchaga ma'lum bo'lsa kerak.

Men shaxsiy kuzatuvlarim asosida masjidda jamoatning foydalarini, shu asosda masjid tashqarisida ham shunday harakat qilishimiz lozimligini aytmoqchiman.

Masjidda jamoat orasi jips bo'lishi aytiladi, hayotda ham barchamiz shunday birdam bo'lib harakat qilishimiz kerak.

Masjidda qavmning eng afzallari imom( boshliq) bo'ladi, qolganlar unga ergashadi. Imom xato qilsa, to'g'irlashadi. Mabodo imomga nimadur yetib qolsa, qavm imomsiz qolmaydi, undan keyin albatta munosib imom o'tishi kerak.

Masjidda birinchi safda bo'lishga targ'ib qilinadi, hayotda ham musulmonlar peshqadam bo'lishlariga ishoradir balki.

Masjidda jamoat azolari biri xato qilsa, boshqasi xatosini aytib, tuzatadi, endi qo'shilganlarga o'rgatiladi, xattoki kiyimida to'g'irlash kerak bo'lgan joylarini to'g'irlashadi yoki shu haqida aytishadi.

Masjidda haqiqiy birdamlik, Alloh yo'lida yonma-yon bo'lish, yordamtalablarga yordam berish, yana boshqa hikmatlar chiqarish mumkinki, bularni hamma o'zi fikr qilib ko'rishi kerak.

Asosiy mohiyat shundan iboratki, biz shu masjidda o'rgangan, amal qilgan narsalarimizni uning tashqarisida ham qo'llashimiz lozim bo'ladi. Ana shunda haqiqiy birdam bo'lamiz.

Aytmoqchi bo'lganlarimni oz bo'lsada yetkaza oldim deb o'ylayman. Xulosa esa o'zingizdan...

Doston Ravshan

17.04.2024