Nasiba Shokirjon qizi

Nima uchun qalbda Alloh taoloning muhabbati bo'lishi kerak? Uning sabablari bormi?

Buning ikki asosiy sababi bordir.

1-Sabab. Hammaga ma'lum bo'lgan odat shuki, qaysi kishiga birovdan yaxshiklar yetsa, mehribonliklar ko'rsatilsa, u kishi o'zining yaxshilik qiluvchi mehribonidan benihoya mamnun bo'ladi. Uni yaxshi ko'rib qoladi.

Do'stim! Axir, biz Alloh taoloning ne'matlarini son-sanog'iga yeta olmaymiz. U Zotning bizga bergan ne'matlarini fikrlab ko'raylik.

2- Sabab shuki, Alloh taolo qodiri mutlaq va nimani xohlasa o'shani mashaqqatsiz amalga oshiruvchidir.

Ko'p o'ylab, siqilma

Ey ko'ngil,

Nega mayda-chuyda buncha narsalarga g'am chekasan?

G'am bilan nega siqasan jonni, jononni?

Yozgan Haqdir. Yozilgan haqingdir.

Ozor berma egasiga.

Sabr, shukr, duo uchburchagida bo'l. Sabring salomatlikka, shukring hidoyatga, duoying esa rahmatga aylanadi Inshaa Alloh...🕊

Sen hamisha bahorda qol

Hayoting fasllarga o'xshaydi. U goh yozga, goh qish fasliga aylanadi. Har qanday mavsumda ham hayoting bahor bo'lsin. Buning uchun faqat birgina shart mavjud: hammasi o'tkinchi ekanini unutmaslik...

Ko'rdim, bildim va ishonadimki ...

Yo'l Sengadir. Parvardigor! Ketish Senga, borish Senga. Bilaman, tikanli yo'ldir bu. Yiqilish ham bor, qoqilish ham. Tuzoqlarga to'ladir Senga boradigan bu yo'l. Bu yo'ldan bir amallab o'tiladi, bilaman. Sening Hidoyatning, Sening marhamating yuritishi mumkin faqat. Yolvoraman, tut qo'llarimizdan. Ovchining jozibador ko'ringan tuzog'iga tushirma bizni. Xato qilib, tushsak ham, Sen bizni u yerda qoldirma.

Ko'rdim, bildim va ishonadimki, Sening rahmating bo'lmasa, hech bir banda baxtga erisha olmaydi.

Bizni baxtga erishganlardan qil.

Ey, Menga eng buyuk ne'matlarni ato etgan Robbim! Yo'q qilsang, yo'q bo'lgum, bor qilsang, bor bo'lgum. Menga neki buyursang, shukr qilgum.