Yastiriy Ibn Nizam Al-diyn

Osmon qoraygan, sovuq bir fasl,

Unda ko'rinmaydi sayroqi qushlar.

Unda maqsad faqat bittadir,

Unda chiqish kerak bu yili qishdan.

Tuman barqigan tog'ning og'zidan,

Kimnidur axtarib sang'iydi bo'ron.

Suvi muzlagan soyning bo'g'zidan,

Ko'rinadi yashil, archazor o'rmon.

O‘rmon chetida kichik bir kulba,

Kulba mo'risidan mo‘ralar tutun.

Shaharda esa she'r yozar telba

Unga qiziq edi kecha va bugun.

Kechani tezda yashab ham bo‘ldi,

Bugunni yashardi botgancha g‘amga.

Sershiddat yoshlik ovulda qoldi,

Shahar to‘la edi achchiq a'lamga.

Bu yerda seni tushunmas birov,

Bu yerda kinoya tig‘dek botadi.

Bu yerda qishda tushmaydi qirov,

Bu yerda qor emas dardlar yog‘adi.

Balki shu uchun zo‘r shoirlar ham,

Mashhur bo‘lishgandur katta shaharda.

Shaharda qissa, shaharda roman,

Shaharda bo‘lgandur bari shaharda.

So'ng adabiyot yuksaldi bora,

Ko'rsatib insonning zavqli hayotin.

Shaharda hayot qaynar tobora,

Tobora qaynardi achchiq azobi.

Afsus yo'qolgan mayus ovozlar,

Bola sog'ingandur ona allasin.

Yo'qdir iltifot, yo'q iltimoslar,

Shu yerda erur hamma, hammasi.

Lekin, o'rmonda, kichik bir kulba,

Kulba mo'risidan mo'ralar tutun

Sokinlik poylar eshik oldida,

Sokinlik o'rmonda yashashga mahkum.

©️Yastiriy

Haqiqat

Ko'nglimni g'ashlik kemirdi biroz,

Lek sokinlikni etmadim orzu.

Ezilsam o'ylab ezildim holos,

Kim menga mayoq, kim bo'ldi qozi.

Qalbda qaynar ming yillik po'rtana,

O'xshatma uni mungli yoshlarga.

Ichimda suvlar toshadi yana,

So'ngra urilar qoyatoshlarga.

Yig'latsa "alkimyo"¹ yig'latar meni,

Temirni oltin qilgan o'sha u

O'rganib qumning mahfiy tilini

Cho'lda adashmay yurgan tuya u

U sen o'qigan qalin kitobmas,

Ehromlargacha cho'zilgan yo'l u.

Toqqa chiqiboq bir kulgan nafas,

Billur idishda choy tutgan qo'l u.

Menga moziyni qilma rivoyat,

Menga so'zlagin umum ovozda².

Menga hozirni qilgin hikoyat,

Tarix har doim qolar qog'ozda.

Bo'ldi o'tmishni kovlama endi,

Tilingdan kelsa³ bugunni alqa

Ayta olaman - o'zimga keldim

Axir qaytardi hayotga "Halqa⁴"

Keltirsam ko'pdir yana misollar,

Tillar sanashga ulgurmaydilar.

Insondek emas bilsang kitoblar,

Ular tiriklay o'ldirmaydilar.

©️Yastiriy

1. Alkimyo - Alkimyogar (Paolo Keolo) asaridagi har qanday metallni oltinga aylantiruvchi yoki zamirida butun koinotu mavjudotlarni birlashtirib turuvchi unsur.

2.  Umum ovoz - hissiy fe'l ila hamma tushuna oladigon muloqot shakli

3. Tilingdan kelsa = qo'lingdan kelsa.

4. Halqa - Akrom Malikning halqa asari.

Hello from Uzbekistan

Facebook va instagramni tark etdim.

O'zbekcha she'rlardan o'qishni hohlaysizmi?

Unda menga obuna bo'ling, sizlarni she'rlardan tashqari boshqa qiziqarli va foydali actionlar ham kutib turibdi😎