Umidjon Xasanov

Булбул.

Таралар оромбахш садо оҳанги,

Қалблар ҳапқиради шавқ узра ҳил-ҳил.

Сайроқи зоғлардан тўйган оламни,

Муҳаббатга тўлдир эй ошиқ булбул.

Ошиқлар ҳонишинг кутдилар узоқ,

Орзиқмишди гулзор мозийни қумсаб.

Бул кунгача қанча қўймишлар тузоқ,

Не булбуллар қолди овозсиз бе сас.

Ҳар неки сайраса этдилар тоқат,

Қарғами, майнами ва ёки каклик.

Бир куй таралмасин дедилар фақат,

Булбул ноласига бўлдилар рақиб.

Машуқинг сўзларин куйлаганинг он,

Сел бўлар боғ аро яхшию ёмон.

Ҳидоят уфурар ҳар парвозингда,

Оҳ уриб кўтарил маконинг томон.

Қадимий бу гулзор булбуллар боғи,

Аждодларинг оҳи тилларда достон.

Бир вақтлар ҳар гулга етмиш саноғи,

Булбул сероб эди ошиқлар мастон.

Қаҳатур-рижолий бир оғир замон,

Булбуллар тарк этмиш гулзорим тамом.

Панаю пастларда сайровни қумсаб,

Оҳ урди ошиқлар истабон имдод.

Беркиниб бинафша ораларига,

Термулиб гулларнинг сараларига.

Минг бир жасоратла кўксингни кериб,

Букун сайра жоним яраларига.

Сайрагинг булбулим гулзорим элаб,

Сайра ошиқларни қонларга белаб,

Тўхтама қувватинг бўлсаҳам адо,

Сайрагин бул боғга ҳидоят тилаб.

Таралар оромбахш садо оҳанги,

Қалблар ҳапқиради шавқ узра ҳил-ҳил,

Сайроқи зоғлардан тўйган оламни,

Муҳаббатга тўлдир эй ошиқ булбул...

23:56. 21.03.2023. Умиджон Хасанов

@umidjon_xasanov

21 март-Ўзбекнинг буюк шоири, халқ қахрамони Абдулла Орипов туғилган кун!

Аллоҳ ғариқи-раҳмат қилсин.

ТАФСИР

Тузумлар ўзгарса ҳам,

Инсон ўзгармас экан.

Тизимлар ўзгарса ҳам

Инсон ўзгармас экан.

Жаҳолат даврида ҳам

Авлиё — авлиёдир.

Кафорат даврида ҳам

Анбиё — анбиёдир.

Балки даврон йўруғи

Аслан тўғри бўлгайдир.

Лекин минг бор дод дема,

Ўғри — ўғри бўлгайдир.

Ҳар қадамда бир масжид

Қурганинг билан, инсон,

Инсоф бермаса, ҳеч ким

Муслим бўлмас ҳеч қачон.

Кўпкарига кирганнинг

Ҳалоллик эрур дарди.

Лекин улар сафида

От сурар бир номарди.

Гоҳида садоқатли

Дўстларинг қолиб бир ён,

Йўлин топиб, қўйнингга

Кириб олгайдир илон.

Мўмин деб атар ўзин

Гоҳ яхши ҳам, ёмон ҳам.

Кайси бири ҳақ эрур?

Ўзи билгайдир Эгам.

Тузумлар ўзгарса ҳам

Инсон ўзгармас экан.

Тизимлар ўзгарса ҳам

Инсон ўзгармас экан.

Шул боисдан Пайғамбар

Уммат ғамин еганлар.

Аллоҳдан бошқасига

Сиғинмагин, деганлар.

1996

✍ Абдулла Орипов

@umidjon_xasanov

Недан бари шундай? Не учун бундай?

Недан оқил хору, азиздир нодон?

Недан шўрлик гўдак зорланар тинмай?

Недан золим юзи ҳар замон шодон?

Недан тупроқ ости сокину, усти

ваҳшат узра титрар, тўлғонар тинмас?

Недан фожир шилар олимнинг пўстин,

Недан жазба отин дарвешлар минмас?

Недан Холиқ бермиш ақл ила виждон?

Аммо толмасин деб қилдик эҳтиёт.

Унинг ўрнигаҳам ишлар ошқозон,

Баҳоюндан бир фарқ қолмишдир калом.

Недан кўкдан инган инъомлар қолиб,

Талпинар қул қулга истабон неъмат?

Недан даъво айлар раззоқлик ё Рабб,

Ўзин уйғотолмай ухлаган бир абд?

Недан? Недан? дея йиртилар томоқ,

Саволлар ўрайди, кетмайди нари.

Бир дона жавобни англагин ўртоқ,

Қадарда битилган қазолар бари!

22:37. 19.03.2024. Умиджон Хасанов

@umidjon_xasanov

I

Қўлимда тутганим қаламми билмам,

Кўксимни тўлдирган аламми билмам,

Зулматла бурканган хонамда бир ман,

Ўзимдам Ўзингга шикоятим бор.

Шафақга термулган кўзларим беҳол,

Боқибон атрофга бўладурман лол,

Йўлбарс ўлакса ер, панжалари шол,

Золим қашқирлардан ҳикоятим бор.

Тогги шабнам мисол беғубор ҳислар,

Минг умид, минг ишонч боғлабон кўзлар,

Чошгоҳгача бормай ўзгарар туслар,

Бир чақмоқ синдирар матонатим бор.

Шамол улоқтирган ночор ҳазондек,

Кечам жазирама, эртам тўзондек,

Тополмай бир рафиқ, қуруқ ўзандек,

Бир мавжли дарёга муножотим бор.

II

Яралар саноқсиз, йўқ малҳам,

Шиорлар баланду–кор мубҳам,

Гулзорим кутмоқда бир одам,

Келса гар тутажак бир байъатим бор.

Булбуллар жам бўлмиш қафасга,

Нола не?! қувват йўқ нафасга,

Ножинслик урф эмиш ҳавасга,

Илоҳо яхшиям Қиёматинг бор!

Маънолар излайман наводан,

Қарғалар сайраган садодан,

Чиқолмай юз йиллик хатодан,

Афсусдан қурган бир иморатим бор.

Барчаси фонийдир, ўзинг ҳақ,

Мен муҳтож бир фақир, сен Раззоқ,

Ходимга Маҳдумдан бордир ҳақ,

Бир дона сўражак ҳидоятим бор.

Ўзимдан Ўзингга шикоятим бор...

23:36. 18.03.2024. Умиджон Хасанов

@umidjon_xasanov

Номус улуғ юкдир, шарафли юкдир,

Иймонсиз бул юкни кўтармоқ душвор.

Ҳаё иймондандир демиш Азиз тил,

Иккисин айириб бўлмайди зинҳор.

Гар тоқати ўлик кимсалар бордир,

Дегайлар номусинг улоқтир бу кун.

Дегаймиз инсонлик бизларга кордир,

Ҳойвондек яшамоқ сизларга маъқул.

Кифоят этмаса башарий калом,

Сўз зойи рақибинг бўлса бе тайин.

Ҳал этар мушкулни илоҳий Калом,

Сизга ўз дийнингиз, менга ўз дийним.

00:13. 19.03.2024. Умиджон Хасанов

@umidjon_xasanov