Abdulqodir Samarqandiy

ОЛДИН ЗАРАРНИ ДАФ ҚИЛИНГ

Қосим ибн Муҳаммад роҳимаҳуллоҳдан ривоят қилинади:

“Абдуллоҳ ибн Аббос розияллоҳу анҳудан сўрашди:

-Сизга амали ҳам, гуноҳлари ҳам оз инсон ёқадими ёки амали ҳам, гуноҳлари ҳам кўп инсон ёқадими?

Ибн Аббос розияллоҳу анҳу деди:

-Мен хавфсизликка ҳеч нарсани алмаштирмайман!”.

Ҳақиқий иймон ҳалол амални кўп қилишда эмас, ҳаромдан сақланишдадир.

Ҳаром бўлган бир дирҳамни тарк қилиш ҳалол минг дирҳам садақа қилгандан афзалдир.

Ҳақиқий тақво суннатларга кўп амал қилишда эмас, маъсиятлардан четланишдадир.

Зино қилмасдан, ғийбат қилмасдан, хиёнат қилмасдан хуфтонни ўқиб ухлашингиз зино қилиб, ғийбат қилиб, хиёнат қилиб кечаси билан намоз ўқиб чиққанингиздан афзалдир.

Аммо ҳаромни тарк қилсангиз ва унинг ёнида ҳалол ишларни ҳам қилсангиз иш тўғри ва мукаммал бўлади.

Кечаси қоим бўлсангиз ва унинг ёнида зинони, ғийбатни ва хиёнатни тарк қилсангиз иш тўғри ва мукаммал бўлади.

Пойдевор аслида мана шу. Мисоллар тушунтириш учун келтирилди!

https://t.me/Abdulqodir_Polvonov

Биров сизга ҳақиқат аччиқ бўлади деса билингки, у ўзининг ҳақиқатлари ҳақида гапираётган бўлади.

Биз фақатгина ўзимизнинг ҳақиқатимизни аччиқ, бошқаларнинг ҳақиқатини эса ширин бўлади деб ўйлаймиз!

https://t.me/Abdulqodir_Polvonov

ЯНГИ ЙИЛ

1. Янги йил олдида турибмиз. Шу муносабат ила шуни эслатиб ўтар эдимки, ўзаро алоқалар роҳат учун, ҳамдардлик учун, қўллаб-қувватлаш учун, суяш учун жорий қилинган. Ички хотиржамлигингизни сиздан тортиб оладиган кимсалар ва нарсалар сизга керак эмас. Дўстини ўзгартираверадиганлар сизга керак эмас. Бугун бу ерда, эртага бошқа ерда бўладиганлар сизга керак эмас. Ўзгаларга иккинчи имконият бўлишдан воз кечинг. Менюдаги иккинчи танлов бўлманг. Доимо сизни ҳаммадан олдинга қўядиганлар билан бирга бўлинг. Нафсий парчаланишнинг ўрни сизнинг ҳаётингиз эмас, руҳий шифохонадир!

2. Янги йил олдида турибмиз. Инсонлар билан алоқаларингизни тузатинг. Аразлаган яқинингиз, алоқани узган қариндошингиз, узоқлашган дўстингиз билан алоқани боғланг. Дунёйимиз уни аразлаш ва узоқлашиш билан ўтказишдан анча қисқадир. Дунёйимиз хусумат қилишга арзимайди. Кишиларнинг қалбини синдириб, сўнгра уларнинг жанозасида кўз ёши тўкишимиздан нима фойда?! Тирикликда унинг олдига бормадик. Шу муносабат билан шуни айтиб ўтаманки, бу банддаги нарсалар юқоридаги банддагиларга зид эмас. Биламизки, алоқалар уйга ўхшайди. Баъзисини таъмир қилиш керак, баъзисини эса бузиш!

3. Янги йил олдида турибмиз. Ёдингиздан чиқмасин, бу дин сиз билан ҳам, сизсиз ҳам ғалаба қозонади. Масжидга бормасангиз кимдир бориб уни обод қилаверади. Қуръон тиловат қилмасангиз кимдир уни ўқийверади. Карвон Аллоҳ томон кетаверади. У фақатгина жаннат эшиги олдида тўхтайди. Карвонда бўлмасангиз зиён қилувчи фақат сиз бўласиз!

4. Янги йил олдида турибмиз. Ёдингиздан чиқмасин, ҳақ билан ботил ўртасидаги жанг токи Исрофил алайҳис салом Сурни чалгунича давом этади. Ботил қанчалар кучли бўлмасин барибир мағлуб бўлади. Ҳақ қанчалар заиф кўринмасин барибир ғолиб бўлади. Ўрнингизни аниқлаб олинг. Энг аҳмоқ инсон дунё учун охиратини сотган инсондир. Бундан ҳам аҳмоқроқ инсон бировнинг дунёси учун охиратини сотган инсондир!

5. Янги йил бошида турибмиз. Аллоҳ билан алоқангизни тузатинг. Агар воз кеча олмаётган гуноҳингиз бўлса билинг, ҳаммамиз гуноҳкормиз. Тавбани бошлаш имкони бу!

6. Янги йил олдида турибмиз. Қуръондан кундалик вазифа қилиб олинг. Уни тарк қилмасликка ҳаракат қилинг. Зикрлардан вирдларингиз бўлсин. Қанчалар банд бўлманг, уни тарк қилманг!

7. Янги йил олдида турибмиз. Яширин амалингиз бўлсин. Озгина садақами, бир бурда нонми, беморга олиб берадиган бир қути дори бўлсада ҳеч ким билмайдиган, фақат Аллоҳ биладиган хайр ишингиз бўлсин. Йил бўйи зуҳо намозни тарк қилманг. Таҳажжудга ҳаракат қилишга қасд қилинг. Буни ҳатто хотинингиз сезмасин!

8. Янги йил олдида турибмиз. Нимадир фойдали иш қилинг. Фойдали китоб ўқишми, манфаатли кўрсатув томоша қилишми, илмий давраларда иштирок қилишми, ижтимоий лойиҳаларга қўшилишми ва ҳоказо…!

9. Янги йил олдида турибмиз. Билингки, кўпчилик муносиб инсонни кутади. Аммо озчилик ўша муносиб инсон бўлишга ҳаракат қилади. Кўпчилик ўрим-йиғим мавсумини яхши кўради. Аммо ер ҳайдашни, уруғ экишни, суғоришни, ўғит беришни яхши кўрадиганлар оз. Бир жойда ўтириб орзу қиладиганлардан бўлиб қолманг!

10. Янги йил олдида турибмиз. Ўтган йили вафот қилганларнинг бари ўлишини билмаган эди. Улар ўлимни ўзларидан узоқда деб ўйлашган эди. Намозни худди охирги намозни ўқиётган инсон каби ўқишга амр қилинганимиздек, янги йилни ҳам худди охирги йилни яшаётгандек эҳтиёт бўлиб яшашга уринишмиз керак!

https://t.me/Abdulqodir_Polvonov

ҒАЙРАТ

Ибн Аби Шайба роҳимаҳуллоҳ ўзининг “Зуҳд” номли китобида келтиради:

“Абу Салама розияллоҳу анҳу айтади:

“Набий саллоллоҳу алайҳи ва салламнинг саҳобалари ҳафсаласиз инсонлар эмас эди!”.

Улар мажлисларида шеърлар ўқишар эди, жоҳилиятдаги ишларини эслашар эди.

Агар уларнинг динига боғлиқ томонига кимдир тажовуз қилмоқчи бўлса ғайратдан уларнинг кўзи худди мажнуннинг кўзлари сингари бақрайиб қолар эди…

Иш агар дунёга боғлиқ бўлса бағрикенг бўлаверинг. Ҳазиллашинг, кулишинг, шеърхонлик қилинг, жозибадор суҳбатлар қилинг, сайрга чиқинг, ошхонага боринг, бозорга боринг. Ҳаёт мубоҳлар билан жуда ҳам жозибали…

Аммо иш динга боғлиқ бўлганида тош каби қаттиқ бўлинг, метин каби бақувват бўлинг. Гарчи кишиларга ёқмасада, динингиздан бироз бўлсада чекинманг!

https://t.me/Abdulqodir_Polvonov

Уларнинг ўзини хўжайин каби тутишини олдини оладиган илк қадам, биз ўзимизни қул каби тутмаслигимиздир!

https://t.me/Abdulqodir_Polvonov