Muslim ሙስሊም

#ትዕግሥት (#ሶብር)

#ክፍል_18

#ሐዲሥ 3 / 42

ኢብኑ መስዑድ እንዳስተላለፉት፦ የሑነይን ዘመቻ ዕለት ነበር። የአላህ መልዕክተኛ በምርኮ አከፋፈል ላይ ለተወሰኑ ሰዎች ከሌሎች ብልጫ ያለው ድርሻ ሰጡ። ለአረዕ ኢብኑ ሐቢብ መቶ ግመሎችን ለገሡ። ለዐየነህ ኢብኑ ሒሰንም እንዲሁ። ከዐረብ ታላላቅ ሰዎች ለተወሰኑትም ድርሻቸውን ሰጡ። በጊዜው ከሌሎች ብልጫ ያለው ድርሻ ነበር የሰጧቸው። \"በእውነቱ ይህ ክፍፍል ፍትህ የጎደለውና የአላህ ውዴታ ያልተከጀለበት ክፍፍል ነው\" ሲል አንድ ሰው ተናገረ። \"በአላህ ይሁንብኝ ይህንን ቃልህን ለአላህ መልዕክተኛ እነግራቸዋለሁ\" አልኩት። እርሳቸው ዘንድ በመቅረብ ያለውን ነገርኳቸው። ፊታቸው ተለዋወጠ። ፍም መሰለ። \"አላህና መልዕክተኛው ፍትሃው ካልሆኑ ማን ነው ፍትሃዊ ሊሆን የሚችለው?\" ካሉ በኋላ፥ \"ለሙሳ አላህ ይዘንለት። ከዚህ ይበልጥ መከራ ደርሶበት በትዕግስት አሳልፎታል።\" አሉ። \"ከእንግዲህ እንዲህ ዓይነቱን ወሬ አላደርስላቸውም\" አልኩ። (ቡኻሪና ሙስሊም ዘግበውታል)

ከሐዲሡ የምንማራቸው ቁምነገሮች

1/ ለአላህ፣ ለመልዕክተኛውና ለሙእሚኖች ታማኝ ሆኖ መገኘት።

2/ ምግባረ ብልሹነትንና ጥፋትን በይቅርታ ማለፍ የነቢያት ባሕሪ ነው።

3/ መልዕክተኛ የሰዎችን ልቦናዎች ለማዋሃድና ለማጣጣም ይጠቀሙበት የነበረውን ጥበብ የተሞላበት ስልትና ትዕግስታቸውን ይህ ዘገባ በጉልህ ያሳያል።

4/ መልዕክተኛ የነቢያት ወንድሞቻቸውን አርአያነት መከተላቸው።

5/ መልዕክተኛ ሰው እንደመሆናቸው ሰዎች የሚሰማቸው የደስታ፣ የሐዘን ወዘተ.. ስሜቶች ይሰሟቸዋል።

Umma Life

https://ummalife.com/MuslimEthio

ቴሌግራም/ telegram/

https://t.me/ethiomuslim_1

#ትዕግሥት (#ሶብር)

#ክፍል_17

#ሐዲሥ 3 / 41

አቡ ዐብደላህ ኸባብ ኢብኑ አል አረት እንዲህ ሲሉ አስተላልፈዋል፦ የአላህ መልዕክተኛ ከከዕባ ጥላ ሥር ብቻቸውን ተንተርሰው ሳሉ፦ \"ከአላህ ዘንድ ድልን አይለምኑልንም? ዱዓስ አያደርጉልንም?\" በማለት ስሞታ አቀረብኩላቸው። \"ከእናንተ በፊት በነበረው ዘመን ሰውየው ይያዝና ጉድጓድ ተቆፍሮ ከውስጡ እንዲገባ ይደረጋል። መጋዝ ይቀርብና ከራሱ ላይ ተደርጎ ከሁለት ይሰነጠቃል። ሥጋውን ዘልቆ አጥንቱ ድረስ በሚገባ የብረት ሚዶ ይላጋል። ይህ ሁኔታ ከዲኑ አያስተጓጉለውም። በአላህ ይሁንብኝ! አላህ ይህን ጉዳይ ይሞላዋል፤ አንድ ተጓዥ ከሰንዓ እስከ ሐድረመውት ከአላህ ውጭ ምንንም የማይፈራ ሆኖ መጓዝ እስኪችል ድረስ። (ሌላው ቀርቶ) ተኩላ ፍየሎችን ይተናኮልብኛል የሚል ስጋት ሳያድርበት። ግና እናንተ ትቸኩላላችሁ።

በሌላ ዘገባ ደግሞ፦

\"ኩታቸውን ተንተርሰው....፤ ከአጋሪዎች አያሌ ፈተናዎች ደርሶብናል\" የሚል ተወስቷል።

ከሐዲሡ የምንማራቸው ቁምነገሮች

1/ ለዲን ሲባል ስቃይና መከራን መሸከም የሚወደስ መሆኑ።

2/ ነቢዩ በዚህና በሌሎች አያሌ ሐዲሦቻቸው ስለ ኢስላም መስፋፋትና ሰላም ስለመስፈኑ የተነበዩት እውን ሆኖ መገኘቱ እውነተኛ የአላህ መልዕክተኛ መሆናቸውን ያሳያል።

3/ የነቢዩ ባልደረቦች ለኢስላም ሲሉ መከራንና ስቃይን በትዕግስትና በጽናት ተቋቁመዋል። እዚህ ሐዲሥ ላይ እንደተወሳው ለነቢዩ ስሞታ ማሰማታቸው ከምሬት ተነሳስተው አይደለም። ይልቁንም ሰላም ቢሰፍን ሙሉ በሙሉ ትኩረታቸውን አላህን ወደ ማምለክ ለማዞርና ወደ በለጠ የምሉዕነት ምጥቀት ለመሸጋገር ካላቸው ከፍተኛ ጉጉት የተነሳ ነው።

4/ የታላላቅና ደጋግ ሰዎችን አርአያነት መከተል ተገቢ ነው። በዲን ሰበብ የሚደርስባቸውን አያሌ ፈተናዎች በትዕግስትና በጽናት ተቋቁመዋል።

5/ በዲን ሰበብ ፈተና መድረሱ አይቀሬ ነው። ሙእሚኖች በየትኛውም ቦታና ጊዜ ፈተናዎችን በትዕግስት ለማስተናገድ መጣር ይኖርባቸዋል።

6/ ኢስላም የሰላም እምነት ነው።

Umma Life

https://ummalife.com/MuslimEthio

ቴሌግራም/ telegram/

https://t.me/ethiomuslim_1

#ትዕግሥት (#ሶብር)

#ክፍል_16

#ሐዲሥ 3 / 40

አነስ (ረ.ዐ) እንዳስተላለፉት የአላህ መልዕክተኛ (ሶ.ዐ.ወ) እንዲህ ብለዋል፦ “ከእናንተ አንዳችሁ ባገኘው ጉዳት ሳቢያ ሞትን አይመኝ። መመኘቱ ካልቀረ ደግሞ፦ “አላህ ሆይ! ሕይወት ለኔ መልካም ከሆነችልኝ በሕይወት አቆየኝ፤ ሞቴ የተሻለ ከሆነ ደግሞ ሞትን ለግሠኝ” ይበል። (ቡኻሪና ሙስሊም ዘግበውታል)

ከሐዲሡ የምንማራቸው ቁምነገሮች

1/ በሕይወት መቀየትን ወይም ለሕልፈት መብቃትን በተመለከተ ምርጫውን ለአላህ መተው ተገቢ ነው።

2/ ከአላህ ጋር ለመገናኘት፤ በአላህ መንገድ ሲዋጉ ለመሞት ወይም ከተላቀ ሀገር ለመቀበር ባለ ጉጉት፡ እንዲሁም በዲን ላይ ችግር እንዳይደርስበት ሞትን መመኘት የተጠላ አይደለም።

Umma Life

https://ummalife.com/MuslimEthio

ቴሌግራም/ telegram/

https://t.me/ethiomuslim_1

#ትዕግሥት (#ሶብር)

#ክፍል_15

#ሐዲሥ 3 / 39

አቡ ሁረይራ (ረ.ዐ) እንዳስተላለፉት የአላህ መልዕክተኛ (ሶ.ዐ.ወ) እንዲህ ሲሉ ተናግረዋል:- “አላህ መልካም የሻለትን ሰው በአንዳች ችግር ይፈትነዋል።” (ቡኻሪ ዘግበውታል)

ከሐዲሡ የምንማረው ቁምነገር

=› ሙእሚን ፈተና፣ ችግርና መከራ አያጣውም። የሚያጋጥሙት ፈተናዎች ሁሉ ኸይር (መልካም) የሆኑለት ሰበብ በዚህች ዓለም ወደ አላህ ይበልጥ እንዲቃረብ ስለሚያደርጉትና ለመጭው ዓለም ደግሞ ወንጀሉ እንዲታበስለት ሰበብ ስለሚሆኑ ነው።

Umma Life

https://ummalife.com/MuslimEthio

ቴሌግራም/ telegram/

https://t.me/ethiomuslim_1

#ትዕግሥት (#ሶብር)

#ክፍል_14

#ሐዲሥ 3 / 38

ኢብኑ መስዑድ (ረ.ዐ) እንዲህ ሲሉ አስተላልፈዋል፦ -ከነቢዩ (ሶ.ዐ.ወ) ዘንድ ገባሁ፤ አሟቸው ነበር ልጠይቃቸው። “የአላህ መልዕክተኛ ሆይ! ከፍተኛ የህመም ስሜት ይሰማዎታል?” አልኳቸው። “አዎ! ከናንተ ሁለት ሰዎች የሚሰማቸውን ያህል የህመም ስሜት ይሰማኛል” አሉ። “ይህ ማለት እርስዎ እጥፍ ምንዳ ያገኛሉ ማለት ይሆን? በማለት ጠየቅኳቸው። “አዎ! ነገሩ እንዲያ ነው። እሾህም ትሁን ከዚያ በላይ የሆነ አዋኪ ነገር የሚያገኘው አንድም ሙስሊም የለም፡ አላህ በርሷ (ሰበብ) ወንጀሉን ያበሰለት፤ ከዛፍ ላይ ቅጠል እንደሚረግፍ ሁሉ ኃጢአቱ የተራገፈለት ቢሆን እንጅ” በማለት ተናገሩ። (ቡኻሪና ሙስሊም ዘግበውታል)

ከሐዲሡ የምንማራቸው ቁምነገሮች

1/ አንዳች ችግር በሚያጋጥም ወቅት ትዕግሥት ከታከለበት ምንዳ እንደሚያስገኝ።

2/ ከሰው ሁሉ ይበልጥ ፈተናና ችግር የሚደርስባቸው ነቢያት ናቸው። ምክንያቱም እነርሱ ከማንም የላቀ የትዕግስት ችሎታና ጽናት አላቸውና። አላህም ለሰው ዘር አርአያ አድርጓቸዋል።

Umma Life

https://ummalife.com/MuslimEthio

ቴሌግራም/ telegram/

https://t.me/ethiomuslim_1