Gulruh Norkulova

Елкамни эзмоқда тоғдек гуноҳлар,

Йўлимда кетяпман мисли гумроҳлар,

Кўз ёшим тавбамга, буткул гувоҳлар,

Эгилай саждага, ибодат учун,

Тўкворгин гуноҳим Аллоҳим бугун.

Қалбимни тозалай гина, кинлардан,

Аразлаб юрибман баъзан кимлардан,

Ором излаяпман, хушу, тинлардан,

Эгилай саждага ибодат учун,

Тўкворгин гуноҳим Аллоҳим бугун.

Қўлларим очяпман сано, дуога,

Ўзгача боқяпман, энди дунёга,

Ўзимни топширдим, йиғлаб нидога,

Эгилай саждага ибодат учун,

Тўкворгин гуноҳим Аллоҳим бугун.

Сенсан нажоткорим, умидим бисёр,

Қалбимда шу бугун қанчалар иқрор,

Тилимдан тушмайди тавба, истиғфор,

Эгилай саждага ибодат учун,

Тўкворгин гуноҳим Аллоҳим бугун.

Заршид