Ziyo Shokir

БОЛАЖОНИМ

«Омин» десанг, олам назар солсин дедим,

Хақ бергани Хақ йўлидан борсин дедим.

Шайтончалар бармоқ тишлаб қолсин дедим.

Дуога кафт очганингда болажоним.

Тақлидинг ҳам ўзинг каби беғубор кўп,

Макр билмас кўзинг билан меҳрни ўп,

Қахри қаттиқ қалблар ҳам бир уялсин хўп

Дуога кафт очганингда болажоним.

Атак-чечак синалганда йўлчанг билан,

Чархи дунни эрит чучук тилчанг билан,

Бўжиларни боғлаб қўй шу қўлчанг билан,

Дуога кафт очганингда болажоним.

Руҳинг тоза , гард теккизмай ўтмоқ душвор,

Бу найрангбоз дунёнинг минг нағмаси бор.

Нахсу нафснинг нафасидан кетсин мадор,

Дуога кафт очганингда болажоним!

Шукр десанг «р» часини тишлаб қолгин,

Илк шукронанг ширасини ушлаб қолгин.

Ношукрлар кўзларини ёшлаб қолгин,

Дуога кафт очганингда болажоним.

Ҳаёт сенга бор болини этсин инъом,

Иқболингни кўрай кўзим қувнаб мудом.

Илм бирла иймонингга тикла эҳром,

Дуога кафт очганингда болажоним.

Ҳали ўх-хўў олдиндадир чин саждалар,

Қалбим шодлар қалбингдаги илк муждалар,

Эртакларда яшайверсин дев, аждарлар,

Дуога кафт очганингда болажоним.

Боламсану сен барибир Хақникисан,

Иймонинг бут бўлса, хақсан, халқникисан.

Ман-ман деган ёву ётни қилма писанд.

Дуога кафт очганингда болажоним.

Айланайин, Аллоҳимнинг ҳимматидан,

Юракчангга солган хайру-ҳикматидан,

Жумла жаҳон қувват олсин қудратидан,

Дуога кафт очиб турсанг болажоним!

Муаззам ИБРОҲИМОВА

#дуа #ислам