Sherefa Abedila

🚢በቀይባህር ዉስጥ የሚዋኙት የመኖች ብቻ ናቸው!

‼️ የየመን ሁቲዎች ነገር

~~~~~~~~~~~~~~~~~~~~~

.

#የአቅል_አይምሮ_ትዝብት_ለrn05

.

እንዴት አላችሁት ጃል?! ዛሬ ደግሞ እስኪ ትንሽ ስለ የመን ሁቲዎችና የቀይባህር ጉዳይ ትዝብቴን ላዉጋችሁ!

.

የጋዛ ጦርነት ከተነሳ ጊዜ ጀምሮ የተለያዩ ሀገረመንግስታት እስራኤል የምትወስደው በጅምላ ህዝብን የመግደልና የማጥፋት ዘመቻ እንዳላስደሰታቸው ተናግረዋል! እንደ አሜሪካ ያሉና ጥቂት ሃያላን ሃገሮች ደግሞ እስራኤልን “አበጀሽ!” ብቻ ሳይሆን የገንዘብ የጦርና የሞራል ድጋፍ በግልጽ ሲሰጡ ተስተዉለዋል፡፡ የአለም ህዝብ ግን በአብዛኛው የሚያየዉና የሚሰማው ነገር እንዳላስደሰተው በየቀኑ እየወጣ ቢገልጽም ገንዘቡና ሃይሉ ያለው በመንግስታቱ እጅ በመሆኑ የሚሆነዉን ከመጥላት በቀር ሊያስቀረው አልቻለም፡፡

.

ለጉዳዩ ቅርበት አላቸው የተባሉት የአረብና የሙስሊም ሃገራት ደግሞ ሽምግልና ከመቀመጥ እስራኤልን ከመኮነን በቀር እስራኤል ፍጅቷን አላቆምም ካለች በነሱ በኩል ሊደርስባት የሚችል ነገር ስለመኖሩ እንኳን በድርጊት በቃላትም ደረጃ ሲናገሩ አይሰማም፡፡ አንድ ሰሞን ያዙኝ ልቀቁኝ ስትል የነበረችው ቱርክ ኢንኳ ሌላው ቢቀር ከአዘርባዝጃን ተነስቶ ድንበሯን አቋርጦ ወደ እስራኤል የሚገባዉን የነዳጅ መስመር ለማስቆም ቀርቶ ስሙንም እንደማስፈራራያ እንኳ ስታነሳ አይሰማም፡፡

.

በአሁኑ ሰአት ከሌሎች አረብ ሃገራት የተሻለች ነች የምትባለው የአረብ ኢሜሬትስም ጉዳይ ቢሆን በተለይ የእስራኤል ታጋቾችን የማስለቀቅ ሚና እየተጫወተች ሲሆን በምትኩ ደግሞ ጦርነቱ እንዲቆም ሳይሆን እስራኤል በፈቀደችው ልክ ፍልስጤማዊያን ከመገደላቸው በፊት ዉሃ እንዲጎነጩ የማድረጉን ስራ የአለማችን ትልቁ የዲፕሎማሲ ስራ አድርጋው ከዛ ያለፈ ነገር ካልተደረገ ሽምግልናዉን አላካሂድም የሚል ማሳሰብያ እንኳን ስትሰጥ አይሰማም፡፡

.

ከዚህ ሁሉ በተለየ መልኩ ድሃይቱና በማእቀብ የምትንገላታው ከሳዉዲ ጋር ከተደረገው ጦርነት ገና ያላገገመችው የመን እስራኤል ጦርነቱን ታቆም ዘንድ በእጅዋ ያለዉንና ልታደርግ የምትችለዉን ነገር በመገምገም በአለማቀፍ ደረጃ ከፍተኛ የንግድ መሥመር የሆነዉን የቀይ ባህርን መስመር በመዝጋት “ጋዛዊያን ላይ የሚደረገው የቦምብ ናዳ ካልቆመ በቀር አንድም መርከብ እኔን አቋርጦ ወደ እስራኤል አያልፍም” በማለት የወሰደችው ተግባራዊ እርምጃ ያልተጠበቀና እጅግ ያነጋገረ ሆኗል፡፡

.

ይህ የፍልስጤም ህዝብን በመደገፍ እየተወሰደ ያለው የየመን ሁቲዎች ድርጊት በእስራኤል እና በአለም አቀፍ ንግድ ላይ ትልቅ ተጽእኖ እያሳደረ ነው። በቀይ ባህር ውስጥ ቢያንስ 12 የንግድ መርከቦች ኢላማ ተደርገዋል ፣በዚህም ቢያንስ 44 ሀገራት ተነክተዋል። የዓለማችን ቀዳሚዎቹ አምስት ዋና ዋና የመርከብ ኩባንያዎች በየመን ሁቲዎች ጥቃቶች ምክንያት በቀይ ባህር በኩል የመርከብ ጉዞን ላለማድረግ እንደተገደዱ ያሳወቁ ሲሆን የብሪታንያ የነዳጅ ዘይት ኩባንያዎች BP በከፍተኛ ሁኔታ የነዳጅ እና የጋዝ ዋጋ እንደሚጨምር አሳውቋል፣ይህም እንደተሰማ ሰሞኑን የእንግሊዙ ጠ/ሚር ከመስመራቸው ወጥተው የጋዛው ጦርነት መቆም ያለበት ስለመሆኑ ሳይወዱ በግድ እንዲተነፍሱ ተገደዋል።

.

እስካሁን በየመን ሁቲዎች የመርከቦች ጥቃት ሰበብ የተጎዳ ሰው የለም ያም ሆኖ ሙሉ በሙሉ በሚባል ደረጃ በቀይ ባህር በኩል ወደ እስራኤል ወደብ የሚደረጉ የንግድ መርከቦችን ጉዞ ዘግተዋል። በአሁኑ ሰአት ከእስያ ወደ እስራኤል የሚመጡ የንግድ መርከቦች እጅግ ረዥምና ዉድ የሆነን መስመር በመከተል አፍሪካን ለመዞር ተገደዋል፣ ይህም ጉዟቸዉን በሶስት ሳምንታት አራዝሞታል፣ ወጪዎቻቸዉንም በከፍተኛ ሁኔታ ጨምሯል። በቀይ ባህር በኩል አቋርጠው ይጓዙ ለነበሩ የእስራኤል የንግድ መርከቦች አሁን አፍሪካን መዞር ግድ ስለሚላቸው የኢንሹራንስ ወጪያቸው ብቻ እስከ 250 በመቶ ጨምሯል።

.

ለዚህም ምላሽ ዩኤስ አሜሪካ አዲስ የባህር ጥበቃ ጥምረት ሃይል ማቋቋሟን አስታውቃለች። ጥምረቱ በአሜሪካ የሚመራ ሲሆን ሌሎች ዘጠኝ ሀገራትን ያቀፈ ነው ። ያም ሆኖ እንደ ስፔን ጣልያንና ፈረንሳይ ያሉ የህብረቱ አባላት “እኛ የምንጠብቀው የሃገራችንና የአዉሮፓ ንብረት የሆኑ መርከቦችን ብቻ ነው” ማለታቸው አሜሪካንንም ሆነ እስራኤልን ያላስደሰተ ሲሆን ሰሞኑን ደግሞ ተጨማሪ የጥበቃ መርከቦችን እንዲልኩ በአሜሪካ ከታዘዘት መሃል ኖርዎይና ሆላንድን የመሳሰሉ ሀገራት ያንን እንደማይፈጽሙ መግለጻቸው ሌላው ያልተጠበቀ ምላሽ ሆኗል፡፡

.

ያም ሆነ ይህ ሁቲዎች ሰሞኑን በሰጡት መግለጫ አሜሪካን በሰየመችው የጥበቃ ቡድን ሰበብ በምንም መልኩ ተስፋ እንዳልቆረጡ እና አሜሪካ መላዉን አለም ማስተባበር ብትችል እንኳ እስራኤልና አሜሪካ በጋዛ ላይ የጀመሩትን ጦርነት ሙሉ ለሙሉ እስካላቆሙና ጋዛዊያን እርዳታ ማግኘት እስካልጀመሩ ድረስ በቀይ ባህር መስመር በኩል ወደ እስራኤል የሚያመሩ ማንኛቸዉንም መርከቦች ላይ ጥቃት መፈጸማቸዉን እንደሚቀጥሉ ተናግረዋል ።

.

ይህም በመሆኑ የነገን ባናውቅም ለዛሬው ማንኛዉም አካል የመን ሳትፈቅድለት ቀይ ባህር ዉስጥ መዋኘት አይችልም! ለጊዜው ቀይባህር ዉስጥ እንዳሻቸው መዋኘት የሚችሉት የመኒዎች ብቻ ናቸዉና!!

.

ሌላው ጥያቄ ከየመን በላይ አቅም ያላቸው ሃገራት ለመሆኑ እስራኤልን የሚያስፈራሩበት ምንም ነገር የላቸዉምን? የሚለው ነው!!

.

ይሄው ነው!