Mırza Abdurahim

قَالَ رَسُولُ اللهِ صَلَّى اللهُ عَلَيْهِ وَسَلَّمَ: أَنَا زَعِيمٌ بِبَيْتٍ فِي رَبَضِ الْجَنَّةِ لِمَنْ تَرَكَ الْمِرَاءَ وَإِنْ كَانَ مُحِقًّا وَبِبَيْتٍ فِي وَسَطِ الْجَنَّةِ لِمَنْ تَرَكَ الْكَذِبَ وَإِنْ كَانَ مَازِحًا وَبِبَيْتٍ فِي أَعْلَى الْجَنَّةِ لِمَنْ حَسَّنَ خُلُقَهُ. (د)‏

Пайғамбаримиз соллаллоҳу алайҳи васаллам айтдилар: “Мен, ҳақли бўлса ҳам тортишувни тарк этган кишига Жаннат четидан бир қасрга кафилман. Ҳазил сифатида ҳам ҳеч қачон ёлғон гапирмайдиган одамга Жаннат ўртасидан бир қасрга кафилман. Ва ахлоқни яхшилаганлар учун эса Жаннатнинг энг юқори даражасидан бир қасрга кафилман”. (Сунан-и Абу Довуд)

02 may 2024

Фазилат тақвими

Оиша розияллоҳу анҳодан ривоят қилинади:

Расулуллоҳ соллаллоҳу алайҳи васаллам: «Эй Оиша, сенга дуоларнинг барчасини ўзида жамловчиси бўлган дуони ўргатайми?» дедилар. Кета туриб: «Эй Аллоҳнинг расули, дуоларнинг барчасини ўзида жамловчиси бўлган дуо нима?» деб айтсам, у зот: «Аллоҳумма инний ас‘алука минал хойри куллиҳи ъожилиҳи ва ожилиҳи маа ъалимту минҳу вамаа лам аълам ва аъузу бика минашшарри куллиҳи ъожилиҳи ва ожилиҳи маа ъалимту минҳу вамаа лам аълам, ва ас‘алукал жанната вамаа қорраба илайҳаа мин қовлин ав ъамалин ва аъузу бика минан наари вамаа қорраба илайҳаа мин қовлин ав ъамалин ва ас‘алука миммаа са‘алака биҳи ъабдука ва Набиййука Муҳаммадун соллаллоҳу алайҳи васаллама ва аъузу бика миммаа таъавваза минҳу ъабдука ва Набиййука Муҳаммадун соллаллоҳу алайҳи васаллам ва маа қозайта лий мин қазоин фажъал ъоқибатаҳу рошада», деб айтдилар.

Маъноси: Аллоҳим, Сендан яхшиликларнинг барчасини – бу дунёдагисию охиратдагисини, билганим-у билмаганимни сўрайман. Ва Сенинг номинг ила ёмонликларнинг барчасидан – бу дунёдагисию охиратдагисидан, билганим-у билмаганимдан паноҳ тилайман. Ва Сендан жаннатни ҳамда унга яқинлаштирувчи сўз ёки амални сўрайман. Ва Сенинг номинг ила дўзахдан ва унга яқинлаштирувчи сўз ёки амалдан паноҳ тилайман. Қулинг ва Набиййинг Муҳаммад алайҳиссалом сўраганларининг яхшисини Сендан сўрайман. Қулинг ва Набиййинг Муҳаммад алайҳиссалом паноҳ тилаганларининг ёмонидан Сенинг номинг ила паноҳ тилайман. Ва бирор ишни тақдир қилсанг, оқибатини тўғри қилгин).

Имом Бухорий «Адабул муфрад» китобида ривоят қилдилар.

Шарҳ: Демак, Аллоҳ таолодан «Расулуллоҳ соллаллоҳу алайҳи васаллам сўраган нарсани сўрайман, Расулуллоҳ соллаллоҳу алайҳи васаллам паноҳ сўраган нарсадан паноҳ сўрайман», деб қилинган дуо жуда кўп нарсани қамраб олар экан.

Уламолар: «Ушбу дуо каби жамловчи ва фойдали нарса йўқ», деганлар. Чунки Набий соллаллоҳу алайҳи васаллам бу дуоларида дунё ва охиратнинг яхшиликларидан бирор нарсани қолдирмай сўрадилар ҳамда дунё ва охиратнинг ёмонлигидан бирортасини ҳам қўймай паноҳ тиладилар», деб айтишган

Расулуллоҳ соллаллоҳу алайҳи васаллам:

«Ким қўлидаги (гўшт ва ёғ) қолдиқларини ювмасдан ухлайдиган бўлсаю, унга бирор (ёқтирмайдиган) нарса етса, у фақат ўзини маломат қилсин», дедилар.

Абу Довуд ривояти.

Намоз нурдир

Уйингизда чироқ ўчиб қолса, қоронғу тушиб қолмасидан бор вақтингизни ўша муаммони ҳал қилиш учун сарфлайсиз. Лекин қабрнинг қоронғулиги ундан ҳам шиддатлироқдир. Ушбу муаммога ечим излаш, ҳал қилиш учун вақтингиздан бирон ишни, амални хослаб, ажратиб қўйганмисиз?!

Мен сизга ушбу муаммони бартараф этишингизда намозга машғул бўлишингизни тавсия қиламан. Нафл намозларни кўпайтиринг, уларни хушуъ билан адо этинг. Чунки Расулуллоҳ соллаллоҳу алайҳи васаллам: "Намоз нурдир", деб марҳамат қилганлар.

ҚАНОАТНИНГ ЗАРУРЛИГИ

Аллоҳ таолонинг бандаларига берган енг буюк инъомларидан бири бу қаноатдир. Аллоҳнинг тақдирига рози бўлиш ва Аллоҳ таолонинг ризқ тақсимига ишониш каби танани ва қалбни хотиржам қилган фазилат йўқдир.

Абдуллоҳ ибн Умар (р. анҳумо) ривоят қилдилар: Расулуллоҳ соллаллоҳу алайҳи ва саллам, икки елкамдан ушлаб дедиларки: " Дунёда (ватанидан ажралган) бир ғариб ёки вақтинчалик йўлчи каби ҳаракат қил.” Ибн Умар ҳазратлари бу ҳадисни ривоят қилганларидан сўнг шундай дедилар: "Оқшомга етганда тонгни кутма ва тонгга етганда оқшомни кутма! Соғлом ва фаровон бўлган вақтнингдан бир қисмини бемор бўладиган кунинга ажрат, ҳаётингдан бир қисмини ҳам ўлим учун ажрат! (Яъни улар учун тайёргарлик кўр.)"

Пайғамбаримиз (с.a.в.), бу ҳадис-и шарифларда Ибн Умар (р.а.)га дунёда қаноатли бўлишни тавсия қилганлар. Чунки ғариб ёки йўлчи кишига  мос келадиган нарса,  асл ватанига етгунга қадар эҳтиёж миқдори нарсага қаноат қилишдир.

Ақсам бин Сафий (раҳ.), ўғлига шундай дедилар: "Эй ўғлим! Қўлингдан қочирган нарсасидан умидини узмаган, доимо уни кузатиб юрадиган одам, тананинг фаровонлигини тарк этган бўлади. Ва бор нарсасига қаноат қилган киши хотиржамлик топади.”

 

 Ақлли одам очкўзлик молни бойлик жиҳатидан кўпайтирмаслигини билади. Қурби етганидан кўпроғини талаб қилиш ҳеч қандай фойда келтирмайди. Шундай экан, қаноат қилиб ҳирсини тизгинлаш керак.  Чунки, " қаноат битмас-туганмас хазинадир." дейилган.

Қаноат қалбда бўлади. Кимнинг қалби бой бўлса, қўли ҳам бой бўлади. Қалби камбағал бўлганга қўлларидаги бойлик фойда келтирмайди. Қаноатли одам ғазабланмайди, хавфсизлик ва тинчликда яшайди. Ва ким қаноаткор бўлмаса, ҳирси ва чексиз истаклари туфайли  доимо қўлидан чиқарган нарсасининг орқасидан югуради. Қаттиқ меҳнат қилиб маҳрум бўлиш бу сифатдаги одамлар учундир.

Муҳаммад бин Каъб ал-Қурозий (раҳ.), Наҳл сурасининг : “Эркакми, аёлми, ким мўмин бўлган ҳолида солиҳ амал қилса, уни пок, гўзал ҳаёт кечиртирамиз...” маъносини англатган 97-оятдаги гўзал ҳаётни, қаноат билан изоҳлаган. Бошқача қилиб айтганда, агар солиҳ банда мўл-кўл ризққа эришса,  шукрини адо қилиб,ухровий мукофот билан шарафланади. Ризқи  тор бўладиган бўлса, сабр қилади, қаноатли бўлади ва тақдиридан рози  бўлади. Шунинг учун унда ҳам охират мукофотларига мушарраф бўлади, дунёда хотиржам яшайди.

29 aprel 2024

Фазилат тақвими