Djamaa karim خليك إيجابي

شوف كي تجي راح ترقد تأكد أنك صليت كامل واش فرض عليك ربي وحاول أنك تقرى أذكار النوم وتلفونك هذا لي راه في يدك قبل ماترقد ماتخلي فيه حتى عفسة تغضب ربي صورة ولا فيديو في مواقع التواصل هاذو لي راك تنشر فيهم فى رد بالك تخلي سيئة جارية فيهم لأنك ماش ضامن إذا حطيت راسك درك راح تفطن غدوة ولالا باش تقدر تصلح واش فسدت وإذا ماقدرتش تخلي صدقة جارية وتخلي عفسة تنفعك بعد ماتتوفى على الأقل فماتخليش عفسة تضرك وتزيدك فالإثم وكي نقولك هكذا ماش معنتها أنا ملائكة ولا مانغلطش بالعكس ربما نغلط كثر منك بصح نفكرو بعضانا في الخير برك وربي يفارقنا بلا ذنوب إن شاء الله ..

""""""Djamaa karim خليك إيجابي

ممكن في هاذ اللحظة راك تخمم تطلع وتهبط بصح نقولك حاجة سيدنا موسى مكانش عارف بلي ربي سبحانو راح يشق البحر على جاله بصح كان واثق أنو ربي سبحانو معاه حتى نتا دير ثيقتك في ربنا وماتحوسش تفهم كفاه خلي حياتك على ربي وراح تنحل أمورك بإذن الله..

""""""Djamaa karim خليك إيجابي

كاين جملة قرأتها تقول :

"الشيطان ماش راح يخليك تبني بيت مسلم بسهولة" ولفت إنتباهي حاجة ماكنتش نصدقها خلاص وهي أنو أي زوج يدخلوا في إطار شرعي للإرتباط كيما الخطوبة ولا الزواج يقرب تصرالهم خلافات ومشاكل من والو ماكنتش نصدق الحوار هذا ونقول لالا كيفاش هاذي لازم نكونوا فرحانين طول الوقت بصح الحقيقة فهمتها كي واحد قالي حنا نكونوا حابين نبقاو فرحانين ديما بصح للأسف الشيطان يلقا مجال أنه يزيد همك فراح تبقى تفكر مثلا واش راح تدير بالدراهم وكيفاه راح تجهز ولا فعلا الشخص راح يقدر يسعدك ولالا ومن أقل مشكلة يهيألك الأفكار السلبية لأنو هاذي حاجة عكس رغبته أنك راح تبني بيت مسلم جديد وراح يبقى فيه ولاد مؤمنين موحدين بالله فكل ماتلقى نفسك تتهاوش مع شريكة حياتك على حاجات تافهة مابينكم أتفكر الآية لي تقول :

﴿ إنَّ الشَّيْطانَ يَنْزَغُ بَيْنَهم إنَّ الشَّيْطانَ كانَ لِلْإنْسانِ عَدُوًّا مُبِينًا ﴾

""""""djamaa karim خليك إيجابي

الحالة النفسية للإنسان ماش شرط تكون متصلة بمدى إيمانه وقوة يقينه وعلاقته بربي برك سيدنا موسى عليه السلام قال "ويضيق صدري" وسيدنا يعقوب بكى حتى "إبيضت عيناه من الحزن" ربي وصف سيدنا محمد صلي الله عليه وسلم بقوله " فلعلك باخع نفسك على آثارهم" باخع أي: مهلك نفسك من الغم والحزن فلازم ماننساوش أنها دنيا وربي قال "لقد خلقنا الإنسان في كبد"وأنو السعادة الأبدية راح تكون فالجنة فديما نستعين بربي على كل إبتلاء ونصبر وندعي دعاء سيدنا محمد صلى الله عليه وسلم ونقول " اللهم إنا نعوذ بك من الهم والحزن والعجز والكسل وغلبة الدين وقهر الرجال "

""""""Djamaa karim خليك إيجابي

لي يشوفك نجمة ماتشوفهش قمر خليك عادل مع نفسك ماتعطيش الناس أكبر من حجمها عيش حياتك لي يحبك ويهتم بيك حبه وأهتم بيه ولي مخليك آخر أولوياته فاصي عليه ماتعرضش نفسك لدائرة الظلم والإستغلال فالنهاية راح تندم 3 أرباع الألم فالبشرية هو عدم إحترامنا لأنفسنا كي نعطي أسخاص مكانة أرفع من المكانة لي أعطوهالنا علاش !

شكون قالك إذا عطيت شخص أكبر من حجمه راح يدخلك الجنة ولا يرفع قدرك عند هاذ الشخص هاذي ماش طيبة ولا حب هاذي سذاجة ومانقدرش نقول عليها حتى مثالية المبادرة حلوة بين الناس بصح لكل شي حدود والشي لي ياخد من طاقتك وياخد من عمرك خليه وبإختصار أحترم نفسك وماتعرضهاش لأذى هي في غنى عنه...

""""""Djamaa karim خليك إيجابي