نور القرآن

تحرير فلسطين، هل اقترب وعد الحق ام يبدا بتحرير انفسنا

﴿ وَأُخْرَىٰ تُحِبُّونَهَا ۖ نَصْرٌ مِّنَ اللَّهِ وَفَتْحٌ قَرِيبٌ ۗ وَبَشِّرِ الْمُؤْمِنِينَ﴾

#غزة #غزة_تحت_القصف #فلسطين_حرة #غزة_الآن

عليكم بتقوى الله في السر والعلانية

لأن النبي صلى الله عليه وسلم

قال ما أمرتكم به فأتوا به ما استطعتم وما نهيتكم عنه فانتهوا

وده معنى التقوى ببساطه شديدة

إنه انت تشوف ربنا امرك بايه وتعمله

وتشوف نهاك عن ايه ومتعملهوش

ويكون رقيب عليك ربنا لو عملت ده

ولو الرقيب عليك هو الله ساعتها حتكون حققت التقوى

لما ترجع في القرآن لآيات الصيام

يا أيها الذين آمنوا كتب عليكم الصيام كما كتب على الذين من قبلكم لعلكم تتقون

الصيام ده انقطاع الإنسان عن الشرب والطعام والجماع للمتزوجين في وقت معين من طلوع الفجر إلى غروب الشمس

طيب مين رقيب عليك الله

ما انت ممكن تاكل وتشرب وانت لوحدك ومحدش شايفك

فعشان كده ربنا قال إنه الصيام ده بيربي التقوى عندك

عشان كده في نهايه الآيه قال

لعلكم تتقون اي لكي تتقوا الله

يعني الصيام بيقوي إيماني ويخليني اتقي ربنا طبعا بيعمل كده من غير ما تحس

لأن ربنا فرضه عشان يعمل كده للإنسان فيصبح بعد فترات الصيام الإنسان عنده تقوى

وطبعا بتزيد كلما بدأت تصوم صيام تطوع غير الفريضة في رمضان

يعني الصيام بيخلي عندك تقوى بدون ما تشعر

نرجع في الختام بقى الغرض من المنشور

اننا نبقى أكثر تقوى لله

طيب حنعمل ده ازاي

اولا تراقب الله في قولك وفعلك

ثانيا يكون عملك خالص لوجه الله عشان لو ابتغيت بعملك وجه لله مش حيأثر معاك مدح الناس أو ذمهم لفعلك فده يجعلك أكثر تقوى لله

ثالثا واخيرا الصيام بيساعد اوووي في التقوى

طيب انا اعمل ايه

تصوم رمضان لأنه فرض وده اي مسلم بيعمله

طيب انا عايز ازود تقوى

ابدأ أصوم تطوع يعني أمته بيكون ده

يعني ممكن اثنين وخميس من كل أسبوع

أو الايام القمريه من الشهر العربي اللي هي ١٣ ، ١٤، ١٥

أو زي شهر شعبان النبي صلى الله عليه وسلم كان يصوم شعبان الا قليلا

أو زي الايام المكفرات للذنوب اللي ثبت أنه النبي صلى الله عليه وسلم صامها وامرنا بصيامها استحبابا زي

يوم عرفه

يوم التاسع والعاشر من شهر الله المحرم

واختم كلامي

أوصيكم ونفسي بتقوى الله عز وجل فهي والله النجاة في الدنيا وسبب لعبور الإنسان للآخرة بسلام بعد فضل الله ورحمته لعباده

وتذكر دائما

والعاقبة للتقوى

أحبتي في الله ❤️❤️

دلوقتي انت كمسلم وماشي في حياتك

المفروض اكيد ليك هدف

تعالى بقى ندردش في الهدف

اي انسان ربنا جعله هدفين أساسيين في الدنيا

الأول

عباده الله سبحانه وتعالى

ودي ربنا حددها في قوله تعالى

وما خلقت الجن والإنس إلا ليعبدون

يعني انت الغرض من خلقك هو عباده الله

وعبادته الله دي ربنا جعلها مقسمة

لعبادات ودي بين المسلم وربه

ومعاملات دي بين الناس في المجتمع ود كتيره حسب الطرف التاني اب ام اخ زوجه ابن ابنه صاحب زميل

وربنا طبعا نظمها كلها في كتابه وسنه نبيه صلى الله عليه وسلم

ده كهدف اساسي قبل أي شئ مقدم عن أي حاجة

يعني مثلا فيما يخص العبادة حديك مثال بالصلاه

يعني الصلاه أمر اساسي ليس قبله اولوليه نهائي

يعني انت في شغل في بيت في شارع اول ما يأذن الأذان توقف حياتك وتروح المسجد عشان ربنا بينادي عليك

وخلي بالك الصلاه لما ربنا نادي عليك فيها ربطها بالفلاح

فلا فلاح بدون صلاه دي قاعده اساسيه

عشان كده الصلاه لما بيأذن ليها المؤذن في المسجد بيقول

حي على الصلاة حي على الفلاح

كده فهمنا اول هدف وهو العباده بمعناها الشامل

ثانيا

الإعمار في الكون كما أمر الله

ربنا قال للملائكة

وإذ قال ربك للملائكة إني جاعل في الأرض خليفة

ده بقى الهدف الثاني انك تعمر وتكون خليفه الله في الأرض وتبتلي فيرى الله هل ستصلح ام تفسد

فتلاقي ربنا سخرك في حياتك في الأعمار ده بالوظيفه اللي انت عليها

مدرس محامي طيار دكتور مهندس عامل نظافه نجار اي كان شغلك

ربنا حيحاسبك عليه لأنه ده الهدف الثاني

وبرضه تطبق فيه تعاليم دينك وتشوف ربنا امرك بايه في جانب المعاملات وتعمله

وتشوف نهاك عن ايه وتتركه

ده جانب وده ربنا وضعه لينا عشان لا نفتر من العباده

فنمشي دايما في حياتنا الهدفين دول قدام عنينا لا نحيد عنهم ابدا

وده الهدف المطلوب منك اللي عشانه ربنا خلقك

وانت ماشي حتلاقي فتن عشان يختبرك الله هل انت صادق ام كاذب في ادعائك بأنك تعبده وتكون خليفته في الأرض

واعلم أن الغايه هي الله وكل ما في الكون وسيله للوصول إليه

فأنت ماشي إلى الله لابد أن تختبر حتى يميز الله الخبيث من الطيب

ارجو تكون استفدت من المنشور

أحبتي في الله ❤️❤️