Ahmad Xaydarov

Бухорийни бизга қачон туғиб берасан

Аср ошди, элим, тинмай тўлғонасан,

Тўлғоқларинг ўлдиргудай, қийналасан,

Умид билан кузатаман тўлғоқларинг,

Бухорийни бизга қачон туғиб берасан?!

Отанг хатин ўқий олмай, ҳайрон ўзинг,

Ўз тарихинг била олмай, нодон ўзинг,

Ёвнинг сўзин такрорловчи бийрон ўзинг,

Ўз суратинг қачон ўзинг чизиб берасан?!

Хоразмийдан Машрабгача ҳофиз Қуръон,

“Қоризода” улуғ элсан, билсанг, ишон,

Аждодларин “жиноятчи” қилган ўғлон,

Душманларинг энди қачон тутиб берасан?!

Ўзлигини йўқотган эл ўзга келмас,

Она ҳуснин сотган улус азиз бўлмас,

Ҳамжинсларни бунчалар ҳам қилдинг ҳавас,

Фарзандларинг кимлар учун сўйиб берасан?!

Ўлсанггина Қуръон сенга керак бўлса,

Тобут билан кирсанггина масжид тўлса,

Аёлингнинг авратини кафан тўсса,

Кутаманми энди қачон ўлиб берасан?!

Бухорийни ҳофизаи Қуръон туғар,

Навоийни қалби тўла иймон туғар,

Темурларни юраклари арслон туғар,

Қачонгача қизларингни бузиб берасан?!

Бухорийни бизга қачон туғиб берасан?!